Inamin ng kompanyang E.C. de Luna Construction na naibigay dito ng Department of Public Works and Highways (DPWH) ang P100 milyong road project para sa probinsiya ng Negros.
Ang pag-amin ay ginawa ng may-ari ng nasabing construction company na si Eduardo de Luna sa ginanap na pagdinig ng House committee on public works kahapon.
Gayunman, sinabi nina de Luna at DPWH Undersecretary Manuel Bonoan na naibigay dito ang nasabing proyekto bago pa man ipalabas ng World Bank ang mga kompanya at personalidad na kanilang iba-ban dahil sangkot ang mga ito sa katiwalian sa gobyerno.
Ipinaliwanag naman ni Bonoan na inimpormahan na sila ng WB noong 2002 at sinabi na rin ang mga contractors na sangkot sa isinasagawa nilang imbestigasyon ngunit hindi pinadalhan ng kopya ng pinal na desisyon nito kaugnay sa pagba-blacklist sa pitong kompanya.
Magugunita na iniuugnay si First Gentleman Mike Arroyo kay de Luna matapos na magkita umano ang mga ito ng 20-beses na agad din naman itinanggi ng huli at sinabing isang beses lamang ito nakipagkita sa una.
Matatandaan na kasama ang nasabing kompanya sa mga na-blacklist ng WB dahil sangkot umano ito sa katiwalian at pagbibigay ng suhol sa mga opisyal ng gobyerno. (Butch Quejada)