Sa pagsalubong sa Bagong Taon: 2 patay, 346 sugatan

Dalawa katao ang na­sawi habang 346 naman ang nasugatan kabilang ang siyam na tinamaan ng ligaw na bala at dala­wang nakakain ng watusi sa pagsalubong sa Ba­ gong Taon sa iba’t ibang panig ng Metro Manila.

Sa kabuuan, ayon sa pinagsamang tala ng Department of Health (DOH) at National Capital Region Police Office (NCRPO), bu­maba nang 35 por­syento ang bilang ng biktima ng paputok sa bu­ong Metro Manila kum­para sa naitalang 822 noong nakaraang taon.

Kabilang sa nasawi ay si Renato Quetolonia, 19 anyos, na idineklarang dead on arrival sa Tondo General Hospital mata­pos na masabugan sa mukha ng pla-pla noong hating­gabi ng Miyerkules.

Ayon kay NCRPO Chief Director Leopoldo Bataoil, 16 katao ang bik­tima ng ligaw na bala.

Nakilala ang ilan sa tinamaan ng ligaw na bala na sina Aaron James Lapus,; Jimboy Guma­pac, 14; Romeo Arnaiz; Edu­ardo Bustamante na mina­las habang nama­masyal sa Luneta; at Rafael Lim, 16.

Isang ginang na siyam na buwang buntis ang nasugatan makaraang tamaan ng ligaw na bala sa pagsalubong kahapon ng Bagong Taon.

Kasalukuyang gina­ga­­mot sa Rizal Medical Center ang biktimang si Sally Patricia, 35-anyos, at resi­dente ng Lower Bicutan, Taguig City, bunga ng tama ng bala sa kaliwang braso nito.

Samantala, sa Isla Sulok, Valenzuela City, isang 40-anyos na si Al­berto Perez ang namatay makaraang tamaan ng ligaw na bala habang nasa terrace siya ng bahay ng kanyang biye­nan at nano­nood ng fireworks display sa pagsa­lubong sa Bagong Taon kamakalawa. 

Sinabi naman ni Health Secretary Francisco Du­que III sa press conference sa East Avenue Medical Center na ang mababang bilang ng mga biktima ng paputok ay bunsod na rin ng pag-ulan noong Miyer­kules hanggang kaha­pon ng umaga.

Malaki din umano ang naitulong ng “scare tactics campaign” ng DOH upang mas lalo pang bumaba ang bilang ng mga biktima ng  paputok. Mananatili na­mang nasa code white alert ang DOH hanggang sa Enero 5.

Nanawagan din si Du­que sa mga local government unit na linisin ang mga bakas ng New Year revelry upang hindi na mapulot pa ng mga bata.