After 10 years: Pulis na sinibak dahil hindi pumasok ng 67 araw, ibinalik sa serbisyo

Nakabalik na sa ser­bisyo matapos ang ma­higit sa 10-taon  ang isang miyembro ng Central Police District (CPD) na sinibak sa kanyang ser­bisyo da­hil sa hindi pag­pasok ng 67-araw.

Sa ipinalabas na de­sisyon ng Supreme Court (SC) en banc, kinatigan nito ang apela ni PO2 Ruel Montoya, ng  CPD Baler station na humi­hiling na tuluyan ng ma­pawalang-bisa ang gina­wang pagsibak sa kanya ng Civil Service Commission (CSC).

Sa desisyon ni Associate Justice  Minita Chi­co-Nazario, inatasan nito ang Philippine National Police (PNP)  na ibalik si Montoya sa kanyang trabaho nang hindi tina­tanggalan ng seniority rights.

Bukod dito inatasan din ang PNP na ibigay kay Montoya ang lahat ng kanyang backwages mula nang siya ay siba­kin hanggang sa kan­yang reinstatement.

Base sa record ng korte, Agosto 15, 1998 ti­nanggal bilang miyembro ng CPD si Montoya ma­tapos na hindi makadalo sa Law Enforcement and Enhancement Course o LEEC sa NCRPO Camp Bagong Diwa, Taguig City dahil sa mayroon umano itong matinding karam­daman.

Naghain ng sick leave si Montoya sa kanyang commander noong Ene­ro 22, 1998 ngunit hindi naaprubahan dahil na rin sa kabilang na ang kan­yang pangalan sa mga inilistang magpa­partisipa sa LEEC.

Sa pagpawalang-bisa naman sa kautusan ng CSC, binigyang-li­naw ng SC na hindi na­bigyan ng due process si Montoya upang ma­idepensa ang kanyang panig laban sa marahas na parusang iginawad sa kanya. (Gemma Amargo-Garcia)