'Roxas doble-kara'
“Hindi lamang asal kalye kundi doble-kara pa.”
Ito ang tinagurian kahapon ng Confederation of Government Employees Organizations (COGEO) sa naging pagmumura ni Sen. Mar Roxas sa ‘anti-cha-cha’ rally noong Biyernes kasabay ng paghamon sa mambabatas na magpakatotoo muna bago ito patuloy na dumaldal.
Pinuna nina COGEO Chairman Jesus Santos at President Flor Ibanez na dati nang nagsalita si Roxas na siya ay pabor sa ‘cha-cha’ ngunit sa pamamaraang consitutional convention o ‘Concon.’
“Pero ngayon, napakaingay ni senador sa pagbatikos sa ‘cha-cha.’ Kung hindi pagiging doble-kara ito, ano ang tawag dito,” puna nina Santos at Ibanez.
Ang masama pa, ayon sa COGEO officials, ang mas gusto pa ni Roxas na ‘con’con’ ay mas magastos pa kesa iminumungkahi na constitutional assembly o ‘con-ass.’
“Kung ‘con-con’ kaya ang isinusulong na paraan para sa ‘cha-cha,’ ganito pa rin kaya kaingay si Sen. Roxas,” tanong pa nina Santos at Ibanez.
Idinagdag pa nina Santos at Ibanez na sa ginawang pagmumura ni Roxas sa ‘anti-cha-cha rally,’ dapat nang katakutan ngayon pa lamang ng sambayanan ang ambisyon nitong maging pangulo ng bansa. (Butch Quejada)
- Latest
- Trending
