BI men bawal bumati ng 'Merry Christmas!'

Kahit dapat laging na­kangiti habang naka-duty, bawal naman sa mga immigration officers na nakatalaga sa mga pali­paran na batiin ang sinu­mang pasahero ng “Merry Christmas” sa buong bu­wan ng Disyembre.

Naglabas si Bureau of Immigration (BI) Commissioner Marcelino Libanan ng memorandum order na nagbabawal sa lahat ng immigration officers at immigration supervisors na nakatalaga sa Ninoy Aqui­no International Airport (NAIA) at sa iba pang sub­ports na bumati ng Maliga­yang Pasyo sa lahat ng dumarating at paalis na pasahero.

Nagsimula ang ban sa pagbati noong December 1 at tatagal ng hanggang January 2009, ayon kay Libanan.

Layu­nin ng kanyang kautusan ay upang hindi mabigyan ng maling im­presyon ang pagbati ng mga kawani ng BI ay nang­hihingi ng tip ang mga ito

Naniniwala si Libanan na susundin ng mga BI personnel sa mga pali­paran ang kanyang kautu­san dahil ang layunin nito ay protektahan hindi lang ang reputasyon ng ahen­siya at mga empleyado nito kundi ang buong bansa.

Ginawa ni Libanan ang kautusan sa gitna ng pag­dagsa ng mga balikbayan at overseas Filipino workers (OFWs) na magbaba­kasyon kasama ang kani­lang pamilya. (Gemma Amargo-Garcia)