P5 rollback sa diesel

Nagsapawan ang mga major at independent oil players sa gina­wang nilang “big time” rollback sa presyo ng kani-kanilang pro­duktong petrolyo na sinimulan kahapon ng madaling araw.

Unang nagpahayag na magbaba ng P5 kada litro sa diesel at P2 sa gasolina ang Pilipinas Shell na sinimulan da­kong 12:01 ng madaling-araw kahapon.

Agad itong sinundan dakong alas-7 ng umaga ng Petron at Chevron sa kaparehas ding halaga na sinundan naman ng PTT Gasoline at Eastern Petroleum.

Subalit ang ginawang rollback ng mga nasabing kompanya ng langis ay tinalbugan ng independent oil player na Unioil na nag­pahayag ng P6 kada lit­rong rollback sa kanilang tindang diesel at P2.50 na­man kada litro sa kanilang gasolina.

Ayon kay Unioil Gene­ral Manager Chito Medina – Cue, epektibo ito alas-2 ng hapon kahapon sa lahat ng kanilang refilling station.

Paliwanag ng mga kom­panya ng langis, na ang panibagong rollback ay bunsod sa patuloy na pag­baba ng presyo ng krudo sa world market na base sa kanila ay uma­abot na lang sa $60 kada bariles mula sa pinaka­mataas na presyo noong Hulyo na umabot sa $147 kada bariles.

Inaasahang susunod din ang ibang kompanya ng langis sa ginawang pani­bagong rollback.

Unang nagbawas ng P4 kada litro ang Sea Oil sa kanilang diesel at P2 naman para sa gasoline at kerosene.

M’cañang nagpasalamat

Nagpasalamat naman ang Malacañang sa mga oil companies kabilang ang big 3 sa pagdinig nito sa panawagan ni Pangu­long Arroyo na ibaba ang presyo ng ka­nilang mga produk­tong petrolyo sanhi na rin ng pagbagsak ng presyo ng krudo sa world market.

Sinabi ni Executive Secretary Eduardo Er­mita, umaasa pa rin ang Pa­lasyo na may mga su­su­nod pang rollback sa da­rating na weekend.

Big time rollback din sa LPG

Matapos magpatupad ng bawas-presyo ang mga oil companies, ini­hayag naman ng Liquefied Petroleum Gas Marketers Association (LPGMA) na mag­pa­patupad din sila ng “big-time rollback” sa kanilang pro­­dukto nga­yong weekend.

Ayon kay LPGMA pre­sident Arnel Ty, ito ay dahil sa patuloy na pag­baba ng halaga ng langis sa world market.

Kabilang sa mga brand na ibinibenta ng LPGMA ay ang Pinnacle Gas, Cat Gas, Omni Gas, Nation Gas at Island Gas.

Bawas pasahe aprub na

 Aprub na sa Land Transportation Franchising Regulatory­ Board (LTFRB) ang 50 sentimos provisional na pagbaba sa pasahe sa mga pampasaherong jeep at P1.00 naman sa bus bun­sod na rin ng ibinabang P5 sa presyo ng produktong pet­rolyo kada litro kahapon.

Sinabi ni LTFRB Chairman Thompson Lantion na malalaman sa Nobyembre 4 kung kailan pormal na ipatutupad ang bawas pasahe sa mga pampasaherong sasakyan.

Ang provisional fare rollback ay nangangahulugan na wala nang magaganap na public hearing dahil agad-agad na lamang itong ipatutupad ng LTFRB.

Sa ngayon, umaabot na lamang sa P39 ang kada litro ng diesel at P41 sa gasolina.