Isinulong kahapon ni Sen. Francis “Chiz” Escudero ang Senate Bill 2678 na naglalayong madoble ang maximum deposit insurance coverage sa bawat depositor ng bangko.
Layunin ng panukala ni Escudero na maprotektahan ang mga depositors at lalong tumatag ang paniniwala ng mga ito sa banking system ng bansa.
Nakapaloob sa panukala ni Escudero na mula sa kasalukuyang P250,000 na maximum deposit insurance coverage, nais niya itong gawing P500,000.
Kung ganap na magiging batas, aamiyendahan ng panukala ang charter ng the Philippine Deposit Insurance Corporation (PDIC).
Dahil aniya sa nararanasang krisis, marami ang nawawalan ng tiwala sa banking system ng bansa kaya dapat palakasin pa ang pundasyon ng banking system ng bansa.Bagaman at hindi pa naman aniya kinakailangan ng bansa ang tinatawag na ‘bailout package’ pero kung maipapasa ang kanyang panukala, mas magkakaroon ng stability sa banking sector.
Masasakop ng panukala sa sandaling maging batas ang 97.2 porsiyento ng lahat ng deposit accounts sa mga bangko sa Pilipinas. (Malou Escudero)