Ban sa Chinese milk product inutos

Ipinagbawal kaha­pon ng Bureau of Food and Drugs ang pama­mahagi at pagbebenta ng mga produktong ga­tas mula sa mga kum­panyang Meng­niu Dairy Co at Inner Mo­ngolia Yili Industrial Group ng China dahil sa hina­lang konta­mi­nado ito ng na­kakala­song kemikal na mela­mine.

Ito ang nabatid sa isang ulat kahapon ng ABS-CBN bagaman, sa isang pahayag, si­nabi ni BFAD Director Leticia Gutierrez na kanila pang sinusuri ang mga pro­duk­to ng Yili at Mengniu na ibi­­nebenta rito sa bansa.

Ilang araw nang na­papabalita ang pagka­kalason ng maraming sanggol sa China dahil sa pag-inom ng gatas na may halong mela­mine.

Ayon sa Bureau of Customs, may 2.14 mil­yong kilo ng gatas ang inimport ng Pili­pinas mula sa China sa unang wa­long buwan ng taong ito.

Sinabi pa ng BFAD na wala pang patunay na nakapasok dito sa bansa ang produkto ng Sanlu group, isa sa mga kum­panya sa China na guma­wa ng nakakala­song ga­tas.

Marami na ring supermarket ang nagpas­yang tanggalin sa kani­lang mga paninda ang lahat ng ga­tas na gawa sa China bago pa man masimulan ang imbesti­gasyon ng Department of Health.

Sinabi ng mga opis­yal ng Philippine Supermarket Association na nais lang nilang tiyakin na wa­lang madidis­gras­ya saka­ling makum­pirma ng DOH na kon­taminado ang mga ga­tas.

Ang melamine ay isang kemikal na ma­taas sa nitrogen content at gi­nagawa itong sang­kap sa paggawa ng mga plastic materials. Kapag naihalo umano ito sa gatas o anu­mang uri ng inumin ay makakasanhi ito ng bato sa kidney o kidney failure partikular na sa mga sanggol.

Kasabay nito, inata­san ni Manila Mayor Al­fredo Lim si City Health Officer Dra. Ma. Lorraine Sanchez na makipagtulu­ngan sa pagkilos ng gob­yerno laban sa gatas na may halong melamine.

Kabilang sa direktiba ang pagkuha ng milk sam­ples para ipasuri sa BFAD at ibalik na lamang ito sa mga tindahan sa oras na maipasuri kung li­li­taw na negatibo sa melamine.

Kabilang sa tinututu­kan ng Manila City Hall ang mga tindahan ng imported products sa Sta. Elena, Sto. Cristo at iba pang tindahan sa Binon­do at Quinta market. (Rose Tamayo-Tesoro, Gemma Garcia, at Ludy Bermudo)