Mistulang bulkang sumabog ang kumalat na balitang patay na umano ang wanted na si 105th Base Commander Ameril Umbra Kato ng Moro Islamic Liberation Front.
Gayunman, sinabi ni 6th Infantry Division Chief Major Gen. Raymundo Ferrer ng Philippine Army na biniberipika pa nila ang ulat.
Sinabi ni Ferrer na sa text message lamang kumakalat ang balitang patay na si Kato na may patong sa ulong P5 milyon.
Ayon kay Ferrer, sa kasalukuyan ay hindi pa nila maaring seryo suhin ang ulat hangga’t wala silang ebidensyang mapanghahawakan.
Ayon kay 6th ID Spokesman Col. Julieto Ando, may natanggap silang impormasyon na diabetic si Kato at maaring magpalala ito sa tinamo nitong sugat sa engkuwentro sa hindi pa nakilalang mga armadong kalalakihan na nanambang sa pasaway na grupo ng MILF renegades.
Pinabulaanan din ng peace negotiator ng MILF na si Mohagher Icbal na patay na si Kato.
“Buhay na buhay pa siya pero di namin siya isusuko,“ sabi ni Icbal. (Joy Cantos)