Mga pasahero ng barko lagyan din ng ‘name tag’ – Gordon

Matapos maghain ng panukalang batas na nag­lalayong gawing mandatory ang pagsusuot ng name tag para sa mga mangingisda upang madaling makilala ang mga ito sakaling lumubong ang kanilang sinasakyang bangka o fishing vessel, iginiit naman ni Sen. Richard Gor­­don na dapat magkaroon na rin ng “name tag” o bracelet na maaaring pagkakilanlan ang mga pasahero ng barko.

Ayon kay Gordon, kung gagawing mandatory ang pagsusuot ng name tag o bracelet kung saan naka­ sulat ang mga detalye ng mga pasaherong suma­sakay ng barko, hindi na magiging mahirap ang pagkilala sa mga ito sa­kaling magkaroon ng sa­kuna sa sinasakyan nilang barko.

Sinabi ni Gordon na kalimitan na nagiging prob­lema ang pagkilala sa mga bangkay ng biktima lalo na’t kung naaagnas na ang mga ito.

Kung mayroon aniyang name tag o bracelet na suot ang mga pasahero mas magiging madali para sa pamilya ng mga biktima ang pag-uwi sa bangkay ng kanilang mga kamag-anak.

Naniniwala rin si Gordon na kaakibat na ang pa­nganib sa paglalayag sa karagatan lalo na’t kung may bagyo o masama ang panahon.

Bukod sa pangalan ng pasahero, ilalagay din sa name tag ang blood type ng biktima at religious affiliation nito upang mailibing kaagad kung kinakailangan. (Malou Escudero)