Nakatanggap ng “kidnap threat” ang mga mediamen na nagko-cover sa Sulu mula sa mga bandidong Abu Sayyaf Group (ASG) na namumugad sa lalawigan.
Kinumpirma ng ilang mamamahayag na nagko-cover sa Sulu na may mga gumagala umanong ban dido sa kanilang tinutuluyang mini hotel at mga cottages na humahanap umano ng tiyempo para dukutin sila at gawing hostages sa kabundukan.
Base sa intelligence report, nagalit umano ang sinasabing mga kaalyadong bandido ni Indanan, Mayor Isnaji Alvarez at ng anak nitong si Haider Isnaji na napili nilang negosyador sa pagpapalaya sa ABS-CBN news team matapos na ikulong ang mag-ama sa PNP-Custodial Center sa Crame kaya gusto ng mga itong maghiganti sa pamamagitan ng pagdukot sa iba pang grupo ng media.
Partikular umanong target ay mga taga-ABS-CBN at iba pang naglilingkod sa malalaking media outfit.
Sa isang text message, kinumpirma ni DZMM reporter Noel Alamar na kasalukuyang nasa Sulu na nakakalap umano ang militar ng impormasyon hinggil sa seryosong kidnap/death threat kontra sa kanilang hanay bunsod upang ilipat sila sa himpilan ng 3rd Marine Brigade sa lalawigan.
Bunga nito, ayon kay Alamar ay napilitan ang puwersa ng Marines na sunduin sila sa kanilang tinutuluyang hotel at isailalim sila sa mahigpit na seguridad.
Sa panig naman ni Benjie Liwanag ng GMA DZBB radio, ibinunyag nitong todo pakiusap sa kanilang hanay ang militar na lisanin na muna ang Sulu matapos na mapalaya na sina Ces. (Joy Cantos)