Ipinagmalaki ni Justice Undersecretary Ricardo R. Blancaflor, chairman ng Task Force 211 o ang Task Force Against Political Violence na ang kanyang pinamumunuang grupo ay nakaresolba na ng maraming kaso ng extra legal killings at unresolved violence cases sa ating bansa simula nang ito ay itatag may limang buwan na ang nakakalipas.
Base sa talaan ng Task Force 211, ang grupo ay nakalutas na ng 34 kaso ng extra legal killings (ELK) habang 200 iba pang kaso ng ELK at political violence ang maingat na mino-monitor simula nang ito ay itatag noong November 26, 2007.
Ang TF 211 ang nakatukoy sa pinagtataguan ni PFC Roderick dela Cruz na itinuturong pumatay kay Ricardo Ramos ng Hacienda Luisita case. Si dela Cruz ay isinurender na rin ng AFP sa NBI upang humarap sa isinampang kaso laban dito.
Maging ang pagkakaaresto kay Aklan Mayor Alfredo Arsenio ay nagresulta rin sa matiyagang pagpupursige ng TF 211 na ito ay mahuli matapos na ituro na pumatay kay local radio broadcaster Herson Hinolan na kila lang kritiko ng nasabing alkalde.
Kabilang din sa mga nagawa ng TF 211 ay ang pagkakaaresto kay Nanding Bitinol na siyang sinasabing pumatay kay Enrico Cabanit kasama na rito ang muling pagbuhay sa extra legal killings sa korte.
Dalawang kaso pa na nadismis ng korte dahil sa kakulangan ng ebidensiya at saksi ang muling inihain ng TF 211.
Inaanyayahan ni Blancaflor ang lahat na suportahan ang TF 211 upang lalo pang maging matagumpay ang ipinaglalaban nito. Maaari ring makipag-ugnayan sa TF 211 sa pamamagitan ng pagbisita sa kanilang website www. taskforce211.com.ph.