MR sa Greencross wala na raw saysay

Bukas umano ang kampo ng Greencross sa ihahaing motion for reconsideration (MR) sa Department of Justice (DOJ) ng dating may-ari nito.

Ayon kay Atty. Estelito Mendoza, abogado ng kumpanya, naniniwala silang wala na ring saysay ang ihahaing MR ng dating presidente ng kumpanya na si Gonzalo Co.

Ito ay dahil sa ibinasura na noong Abril 16, 2008 ni Judge Eugene dela Cruz ng Pasay City Regional Trial Court (RTC) ang kasong estafa na inihain ni Gonzalo Co laban kay Anthony Co na kasalukuyang presidente ng Greencross.

Sa desisyon ni dela Cruz, lumalabas na walang elemento ng estafa sa naturang kaso at kinatigan ang naunang resolution ng DOJ na walang iregularidad na naganap noong ibenta ni Gonzalo Co ang kanyang shares dahil sakop ito ng absolute deed of sale.

Nadiskubre din ng korte na umabot muna sa 20 taon bago inireport ni Gonzalo ang umano’y iregularidad sa bentahan kaya nagpapakita umano ito na walang illegal sa stock increase. (Gemma Amargo-Garcia)