Inirekomenda ni dating Pangulong Joseph Estrada ang paggamit ng condom bilang tugon sa lalo pang pagdami ng populasyon ng bansa.
Ayon kay Estrada, matagal na niyang isinusulong ang paggamit ng family planning method noong si dating Senador Juan Flavier pa lamang ang kalihim ng Department of Health (DOH)
Dahil dito, nananawagan si Estrada sa Catholic Bishops Conference of the Philippines (CBCP) na buksan na nito ang kanilang isipan sa pagpapagamit ng mga contraceptives lalo na sa mga mahihirap na Filipino.
Matatandaan na lumabas sa survey na ang mga mahihirap ang siyang mas maraming anak dahil na rin sa kawalan ng trabaho at ibang libangan, bukod pa rito ang hindi paggamit ng anumang uri ng family planning method.
Sa tala ng National Statistics Office (NSO), umaabot na sa 88.5 milyon ang mga Pinoy.
Ang Calabarzon ang may pinakamaraming populasyon na 11.74 milyon; NCR, 11.55 milyon at Central Luzon, 9.72 milyon. (Doris Franche/Angie dela Cruz)