Colorum na jeep, tricycle sunod na puntirya ng spray paint ng MMDA

Sunod na puntirya ng kontrobersiyal na spray paint campaign ng Metropolitan Manila Development Authority (MMDA) ang mga out-of-line o colorum na mga jeepney at tricycle sa Kalakhang Maynila.

Ayon kay MMDA General Manager Robert C. Nacianceno, nakahanda na ang ahensiya sa phase 2 ng kanilang kampanya upang alisin ang lahat ng mga illegal passenger vehicles na sanhi ng mabagal na daloy ng trapiko sa mga lansa­ ngan ng Metro Manila.

Sinabi ni Nacianceno na sa kabila ng inani nilang kritisismo sa inilunsad nilang spray-painting sa mga colorum at out-of-line buses, napagtagumpayan ng ahensiya na makuha ang atensiyon ng publiko at naalarma rin ang mga illegal bus operators matapos umalma dahil nauga ang kanilang illegal na ne­gosyo.   

Nakikipag-ugnayan na ang MMDA sa lahat ng transport organizations para sa implementasyon ng anti-colorum drive sa mga jeep at aniya ay isusunod nila ang mga tricycle dahil sa hindi rin mapigil na pag­dami ng mga ito na parang mga kabute sa kalsada.

Nakatakdang ipatupad ni Dir. Roberto Esquivel, hepe ng MMDA Traffic Enforcerment Group (TEG) anumang araw mula nga­yon ang kampanya sa illegal passenger jeepney.

Bukod dito, target din ng MMDA na alisin ang mga illegal terminals para mapa­luwag ang mga kalye dahil sinasakop ng mga ito ang malaking bahagi ng dapat sana ay para sa pedestrian at motorist lane. (Rose Tamayo-Tesoro)