Nagpalabas ng warrant of arrest si Pasig City Judge Franco Falcon ng Regional Trial Court Branch 71 laban sa dalawang dating trustees ng Air Material Wing Savings and Loan Association Inc. (AMWSLAI) na sina retired PNP Col. Luvin Manay, PAF Lt. Col. Antonio Mantuano at PAF Major Wilfredo dela Cruz.
Ang warrant ay batay sa reklamong libel ng AMWSLAI trustees na sina Col. Rolando Cacabelos, 2Lt. Cedric Reyes at Capt. Odelon Mendoza, na pawang mga retiradong opisyal ng Phil. Air Force.
Nauna rito, inirekomenda ni Pasig Prosecutor 1 Rey Camilo Dumlao II ang pagsasampa ng tatlong bilang ng kasong libel.
Nag-ugat ang kaso sa isang kontrobersiyal na liham na may petsang Okt. 10, 2007 na ginawa umano ni Manay, sa pakikipagsabwatan daw kina Mantuano at dela Cruz, na nailathala at ipinadala sa pangulo ng isang commercial bank sa Pasig City.
Ayon sa prosecution, layunin ng liham na iligaw ang nasabing bangko at ang publiko na base sa desisyon ng Korte Suprema, na may petsang Okt. 9, 2007, ang mga nagreklamo ay hindi na trustees ng AMWSLAI.
Ang nasabing desisyon aniya, ay hindi pa pinal na dahilan sa napapanahong pagsasampa ng motion for reconsideration ng mga nagreklamo sa Korte Suprema.