Kinumpirma ng Department of Health na kontaminadong tubig ang sanhi ng paglaganap ng sakit na tipus o typhoid fever outbreak sa may 2,000 residente ng Calamba City sa Laguna.
Ayon kay Health Secretary Francisco Duque III, lumilitaw na ang supply ng tubig ng Calamba Water District ay napatunayang positibo sa bacteria na ti natawag na salmonella typhi batay na rin sa isinagawang microbiological tests ng epidemiology experts.
Nabatid kay Duque na nakita din sa pagsusuri na ang water supply ay walang sapat na chlorine na naging sanhi ng outbreak.
Idiniin pa ni Duque na nagsasagawa pa rin ng disinfection at pagsusuri sa suplay ng tubig ang DOH upang malaman kung saang bahagi ng water pipes kumalat ang bacteria. Una nang lumabas sa report na ang bacteria ay nakita sa Bucal pumping station sa Calamba.
Subalit ayon naman kay Dr. Dennis Labro ng Calamba City health office, hindi naman ispesipikong tinukoy ang pinagmulan ng kontaminadong tubig. (Doris Franche)