Abogado ni Lozada, 3 reporter nadukutan ng cellphone

Nadukutan ng cell­phone ang tatlong reporter at abogado ng kontrobersiyal na ZTE deal witness na si Rodolfo Nole Lozada Jr., habang dumadalo sa  candle lighting ceremony sa simba­han ng Sto. Nino sa Ton­do, Maynila kamakalawa ng gabi.

Sa reklamong inihain kay SPO4 Roberto Jime­nez ng Manila Police District-Station, nadukutan sina Michael Fajatin, TV reporter ng GMA news, na nawalan ng cellular phones na nagkaka­ha­laga ng PP55,000; ABS-CBN reporter Jose Maria Villarama  II, na naduku­tan ng tig-P30,000 halaga ng cellphone; Dennis Datu, radio reporter ng DZMM-ABS-CBN, na na­walan din ng cellphone.

Bukod sa tatlo, nata­ngayan din ng cellphone si Atty. Reynaldo Princesa na naroon din sa candle lighting event.

Ani MPD Station 2 chief, P/Supt. Mario Es­pino, madali umanong makagawa ng pandu­rukot sa nasabing pag­titipon dahil dinagsa ng mga tao ang organi­sadong misa para sa katotohanan na inialay kay Lozada. 

Nabatid naman sa ilang source na maaaring maibalik ang mga cell­phones dahil may sindi­kato ng mga mandurukot na nasasakupan ng MPD-Station 2, na sinasabing hawak ng isang alyas “Popoy” na kakilala rin umano ng mga pulis na nakatalaga doon.  (Ludy Bermudo)