Pagkakaisa panawagan ng mga duktor at relihiyoso

Nananawagan ang ilang mga grupo ng doktor at relihiyoso sa mama­ma­yan na magkapitbisig sa pagkamit ng kapayapaan at tunay na pagkakaisa sa gitna ng krisis pampulitika na kinahaharap ng admi­nistrasyong Arroyo sanhi ng sunud-sunod na es­kandalo.

Isinagawa ng mga opis­yal at miyembro ng Philip­pine Medical Asso­ciation at Heal the Nation Interfair Council  ang  pa­nawagan sa News­Stand breakfast forum sa Am­bassador Hotel Manila kamakailan.

Tinukoy nila na ang bansa ay maihahambing sa isang may sakit na nara­ ratay sa karamdaman ng ka­hirapan, katiwalian, tero­rismo at pagkakahi­walay subalit tulad din ng isang tahanang inaanay ay hindi dapat sunugin kundi kaila­ngang linisin sa pes­teng sumisira.

“Nakikita namin na hindi tayo makakaasa sa ating mga lider sa pulitika upang sila ang magsimula sa pag­papagaling sa ating bansa dahil sila mismo ay hiwa-hiwalay sa kanilang panini­wala at pag-iisip. Ma­tagal na tayong naghi­hirap dahil sa ating ka­walang-bahala at ’di-pag­kilos bilang mga ma­ma­mayang nag­ma­ma­hal sa ating bayan,” pinunto ni Philippine Medi­cal Asso­ciation vice presi­dent Rey Melchor Santos, M.D.

Sa kabilang dako, nag­pahayag naman ng pag-asa si Patriarch Florentino Teruel ng Apostolic Catho­lic Church at spokesman ng Heal the Nation Inter­faith Council na ang ka­nilang grupo ay magiging mahala­gang ehemplo para sa ibang mga sektor ng lipu­nan sa pagpu­punyagi na isama nila ang kanilang boses sa pana­wagan para sa pagbabago at pagka­kaisa.

Magsasagawa nga­yong araw na ito ang PMA kasama ang HTNIC ng libreng medical mission para sa kapayapaan at pagkakaisa sa harap ng Manila Broadcasting Com­pany-DZRH radio station sa Cultural Center of the Philippines Compex, Pa­say City mula alas-6 ng umaga hanggang hapon.