Nagpalabas kahapon ng warrant of arrest si Pasig City Regional Trial Court-Branch 67 Judge Amorfina Cerrado-Cesar laban sa mga dating trustees ng Air Material Wing Savings and Loan Association Inc. na sina retired Luvin Manay, Antonio Mantuano, at PAF Major Wilfredo dela Cruz.
Ipinalabas ang warrant batay sa reklamong libel na isinampa ng mga kasalukuyang opisyal ng AMWSLAI na sina Ricardo Nolasco Jr., chairman, Thaddeus Estalilla, vice chairman, at Morado Mercado na pawang mga retiradong opisyal ng Philippine Air Force.
Ang kaso ay nag-ugat sa isang kontrobersiyal na liham na may petsang Okt. 1, 2007 na ginawa umano ni Manay sa pakikipagsabwatan daw kina Mantuano at dela Cruz na nailathala at ipinadala sa pangulo ng isang commercial bank sa Pasig City.
Ayon sa prosecution, layunin ng liham na iligaw ang nasabing bangko at ang publiko na base sa desisyon ng Korte Suprema, na may petsang Okt. 9, 2007, ang mga nagreklamo ay hindi na trustees ng AMWSLAI. Ang nasabing desisyon, aniya, ay hindi pa pinal dahilan sa napapanahong pagsasampa ng motion for reconsideration ng mga nagreklamo sa Korte Suprema.