Upang masolusyunan ang problema ng mga broken marriage sa bansa iminungkahi ng isang mataas na lider ng Simbahang Katoliko na taasan ang “age requirement.”
Sa idinaos na 3rd Bishops’-Legislators’ Caucus sa Pasay City kamakalawa binigyang-diin ni Lingayen-Dagupan Archbishop Oscar Cruz, chairman ng Catholic Bishops Conference of the Philippines (CBCP) na kailangang i-adjust ng mga mambabatas ng Senado at Kongreso ang minimum legal marrying age dahil kalimitang ang mga indibidwal na nagpapakasal sa edad na 18 taong gulang ay maituturing pang “psychologically unprepared” at “emotionally unstable” upang magpakasal, kaya’t ang kasal ng mga ito ay nauuwi lang din sa hiwalayan.
Hindi naman binanggit ni Cruz kung hanggang ilang taon ang nais niyang maging age requirement sa mga taong nais na magpakasal.
Gayunman, ipinaliwanag nito na ang mental capability at kahandaan ng isang tao ay napakaimportante sa isang kasal lalo na’t sangkot umano dito ang pagta taguyod sa iyong sariling pamilya.
Iginiit rin niya na bagamat maraming batas na isinusulong ang mga mambabatas upang maremedyuhan ang mga broken marriage ay wala naman umanong nagpanukala na i-fortify ang mga kasal at maiwasan ang mga paghihiwalay.
“Marriage is never a simple relationship that everyone could just go into. It entails many responsibilities that require physical, emotional and spiritual preparedness,” giit pa ng arsobispo. (Doris Franche)