IBC-13, LRT-2 isusubasta

Nakatakdang isubasta ng pamahalaang lungsod Quezon City ang ari-arian ng government television network na IBC -13 at ilang ari-arian ng Light Rail Transit-Line 2 dahil sa hindi umano pagbabayad ng milyon-milyong halaga ng buwis.

Sinabi ni Quezon City Treasurer Victor Endriga na isinama sa mga ari-ariang isusubasta ang IBC -13 dahil sa hindi pagba­bayad ng buwis na aabot na sa higit P5 milyon.

Kasama rin dito ang LRT Line 2 dahil sa pag­kakautang naman sa higit P100 milyong halaga. Nabatid na tatlong terminal ang nais ipasubasta ng pamahalaang lokal at isang makinarya.  Bumabagtas ang naturang linya ng tren sa Quezon City buhat Katipunan hanggang SM Centerpoint.

Bukod sa mga nabang­git, isusubasta rin ang 20 ektaryang lupain ng Capitol Golf Course dahil sa P50 milyong utang.

Muntik na rin maka­sama sa gagawing subasta ang gusali ng Bureau of Internal Revenue sa kanto ng Timog at Quezon Avenue dahil sa mahigit P1 milyong utang ngunit agad rin namang naayos ng ahensya ang usapin.

Inalis naman sa lista­han ng isusubasta ang kon­trobersyal na Boracay mansion matapos na mag­palabas ng kautusan ang Sandiganbayan dahil sa isyu ng tunay na pagma­may-ari dito.

Matatandaan na na­ging pagmamay-ari ng Quezon City government ang Boracay mansion dahil sa hindi rin pagbabayad ng buwis ng nakarehistrong may-ari nito at isinama na sa subasta noong Set­yembre 15, 2005 ngunit walang pumatol.