Mga pulis bawal mamasko

Nagbabala kaha­pon si Philippine National Police Chief Director General Avelino Razon Jr. sa lahat ng pulis na parurusahan ang sinuman sa kanila na  hihingi ng pamasko sa mga negosyante at publiko.

Inatasan ni Razon ang lahat ng kanyang regional directors at support unit commanders na paalalahanan ang lahat ng kanilang tauhan sa mahigpit na pagbabawal sa anu­mang uri ng paghingi ng pera o regalo nga­yong Kapaskuhan.

Iginiit nito na anu­mang uri ng “solicitation” ay iligal at mali­naw na paglabag sa “Anti-Graft and Corrupt Practices Law” na ma­aaring isampa laban sa sinumang mapatuna­yang lalabag dito.

Nagbabala rin si Razon sa patuloy na iligal na “bangketa operation” ng ilang tiwa­ling tauhan ng pulisya kung saan patuloy ang kotongan sa mga vendors sa mga bangketa at mga iligal na jeepney terminals sa Metro Manila.

Kaugnay nito, nag­babala rin ang pulisya sa mga peke o “hao shiao” na reporter na aarestuhin dahil sa talamak na pangongo­tong rin sa mga opis­ yal ng pulisya at ibang ahensya ng gob­yerno.

Sinabi ni Razon na dapat matigil na ang pangongotong ng mga taong nagpapakilalang reporter ng diyaryo o istasyon ng radio na kung hindi mapagbi­bigyan ay nagbabanta pa na babanatan o susulat ng masama sa isang opisyal. (Danilo Garcia)