Full alert sa bgy., SK polls

Pinaplano umano ng mga rebeldeng New Peo­ple’s Army (NPA) na isa­botahe ang pagdaraos ng barangay at Sangguniang Kabataan (SK) elections bukas sa mga balwarte nitong teritoryo sa bansa.

Bunsod nito, epektibo alas-12 ng tanghali nitong Sabado, isinailalim sa “full alert status” ang may 240,000 puwersa ng Armed Forces of the Philippines (AFP) at Philippine National Police (PNP) sa buong bansa.

Sa pagtataya ng PNP at AFP, ang NPA rebels ay may mass base support sa 2,224 barangay sa buong bansa at nais pang pala­wakin ang kanilang implu­wen­sya sa may 5, 600 mga barangay.

Sa Southern Tagalog Region lamang ay may 28 mula sa kabuuang 22 kan­didato na tumatak­bong Brgy. Chairman ang mina­ma­nok umano ng mga re­belde.

Sa Bicol Region ay si­nusuportahan naman uma­no ng mga rebelde ang mga kandidatong malakas ang tsansang magwagi sa halalang pambarangay.

Sa Region VI o Western Visayas, 84 barangay bets ang sinasabing su­por­tado ng NPA. 

Inalerto na ni AFP Chief of Staff Gen. Her­mo­genes Esperon Jr. ang lahat ng mga Police Commanders sa Luzon, Visa­yas at Min­da­nao na ma­higpit na ipatu­pad ang seguridad para maging mapayapa at ma­linis ang gaganaping hala­lan na inaasahang dadag­sain ng milyong mga bo­tante.

Sinabi rin ni PNP Chief Director Gen. Avelino Ra­zon Jr. na handang–handa na ang pulisya sa gaga­naping halalang pamba­rangay.

Tinagubilinan na nito ang kapulisan na huwag magpabaya sa pagpapa­tupad ng security measures para maiwasan ang pagla­ganap ng mga kara­hasang may kinalaman sa pulitika at tiyakin rin ang kaligtasan ng mga bo­tante, kandidato, poll watchers, Board of Election Inspectors at mga opisyal ng Comelec na mangangasiwa sa hala­lan. (Joy Cantos)