Sinimulan nang palawakin sa mga lalawigan ang Binyagan sa Barangay sa ilalim ng Hulog ng Langit Foundation ng pilantropong si Mark “MJ” Jimenez nang pabinyagan ng libre ang 800 bata mula sa mahihirap na pamilya sa Angono, Rizal noong nakaraang linggo.
Idinaos ang buwena-manong libreng binyagan sa mga lalawigan sa San Clemente Church sa Barangay Poblacion, Angono, Rizal sa ilalim ng pamumuno ni Father Rodny Cruz na isinabay sa pagdiriwang ng ika-3 kaarawan ng anak ni MJ na si Mario Jr.
Noong nakaraang Hunyo, mahigit 6,000 bata mula sa mahihirap na lugar sa Tondo at Pandacan ang pinabinyagan ng foundation sa Manila Cathedral at San Agustin sa Intramuros, Maynila.
Tuwang-tuwa at labis ang pasasalamat ng mga pamilya na nabiyayaan ng Binyagan sa Barangay sa Angono, Rizal dahil maging ang mga damit, sapatos at pagkain ay tinustusan. Layon ni MJ na magpabinyag ng isang milyong bata mula sa mga mahihirap na pamilya sa iba’t-ibang panig ng bansa. (Butch Quejada)