Gov. Panlilio pwedeng kasuhan-Saguisag

Maaaring sampahan ng kasong graft and corruption si Pampanga Governor Ed Panlilio kaugnay ng kontrobersyal na pag­tanggap ng P500,000 cash gift mula sa palasyo ng Malacañang.

Ito ang inihayag ka­hapon sa isang ambush in­ter­view kay Atty. Rene Saguisag.

Sinabi ni Saguisag   na si Panlilio ang dapat na unang kasuhan matapos na umaming tumanggap ng P500,000 cash gift mula sa palasyo ng Ma­la­cañang.

Si Saguisag, isang law expert ay nagsilbi ring abogado sa plunder case ng hinatulang guilty ng Sandiganbayan na si da­ting Pangulong Joseph “Erap” Estrada.

Binigyang diin ni Sa­guisag na ang pag­tang­gap umano ng isang na­ka­upong opisyal ng gob­yerno ng regalo na may kaugna­yan sa ka­niyang puwesto ay ipi­nagbaba­wal sa ilalim ng Republic Act 6713 (Code of Conduct and Ethical Standards for Public Officials and Employees ) at Presidential Decree 46 .

Bukod kay Panlilio, sinabi din ni Saguisag na maaari ring kasuhan sa ilalim ng mga nasabing batas si Bulacan Gov. Joselito Mendoza na uma­min ding tumanggap ng kuwestiyonableng cash gifts.  Sinasabing si Mendo­za umano ang nag-abot ng naturang cash gifts kay Panlilio.

Samantalang nauna nang iginiit ni Panlilio na hindi umano niya batid na P500,000 ang laman ng envelope na iniabot sa kanya sa Palasyo na uma­no’y handa niyang isoli.

Sinasabing namud­mod umano ang Palasyo ng P200,000.00 hang­gang P500,000.00 cash gift upang huwag supor­tahan ang inihaing pani­bagong impeachment case laban kay Pangu­long Gloria Ma­capa­gal Arroyo matapos na ipata­wag sa Malaca­ñang ang mga gobernador at Kon­gresista noong na­ka­­raang linggo. (Joy Cantos)