Namumuo ang hidwaan sa pagitan ng mga senador matapos hayagang tutulan at tuligsain nina Sens. Juan Ponce Enrile at Joker Arroyo ang planog ituloy ang Senate probe sa ZTE brodband deal na tuluyan nang kinansela ng admi nistrasyong Arroyo.
Ayon kina Enrile at Arroyo, wala nang dahilan na ituloy ang pagsisiyasat sa kontratang tuluyan nang pinawalang-bisa. Ani Enrile, kung sino man ang may hawak ng ebidensiya na magdadawit kanino man sa sinasabing anomalya, dapat sa piskalya at hukuman na isampa ang kaso.
Gusto nang itigil ng mga senador ang imbestigasyon sa proyekto ng ZTE Corp. ng China para sa isang National Broadband Network (NBN) matapos “patayin” ng Malacañang ang naturang kasunduan at magbitiw si Comelec Chairman Benjamin Abalos.
Plano kasi ng Senate Blue Ribbon Committee na ituloy pa ang pag-uungkat sa patay nang isyu kahit wala ng session ang Kongreso.
Binatikos din ni Enrile ang plano ng Blue Ribbon na ipatawag si First Gentleman Mike Arroyo sa patuloy na imbestigastyon nito sa ZTE dahil wala namang matibay na ebidensiya na magpapakitang sangkot ito sa anumang iregularidad na konektado sa kinanselang kontrata.
Si Arroyo naman ay nagpahayag na panahon na para gumawa na lang ng committee report ang tatlong komite na nag-iimbestiga rito.
Matatandaang inamin ni Joey de Venecia na wala siyang ebidensiya para ikonekta si First Gentleman sa anumang anomalya sa ZTE.
Kung si dating NEDA director Romulo Neri naman ang ipapatawag, wala na ring puwede pang maitanong dito dahil kanselado na ang kontrata.
Nauna rito, inihayag ni Sen.Alan Peter Cayetano, chairman ng Blue Ribbon na itutuloy pa in ang imbestigasyon sa ZTE contract kahit kanselado na ang kasunduan. (May ulat ni Malou Escudero)