Erap dumalaw kay Doña Mary

Kahit na masama ang pakiramdam ay nagtuloy pa rin sa pag­dalaw sa kanyang inang maysakit si dating Pa­ngulong Joseph Estrada kahapon ng umaga sa San Juan.

Alas-11 ng umaga nang dumating si Erap sa San Juan Medical Center (SJMC) mula sa kanyang resthouse sa Tanay, Rizal ka­sama ang kanyang escort mula sa Police Security and Protection Office, Eastern Police District at San Juan City Police.

Dalawang linggo ng naka-confine sa ospital si Doña Mary Ejercito, 102, dahil sa mga sakit nitong abdominal aortic aneurysm, pneumonia at urinary tract infection bukod pa sa dinaranas na hypertension.

Matatandaang pina­ya­gan ng Sandigan­bayan ang dating Pa­ngulo na makadalaw sa ina mula alas-7 ng uma­ga hang­gang alas-5 ng hapon noong Huwebes subalit ipinagpaliban ito dahil sa masakit ang tuhod nito at may trang­kaso.

Kahapon ay itinuloy na rin ni Erap ang biyahe kahit masama pa ang pakiramdam dahil sa pag-aalala sa kalagayan ng ina.

Napaulat na tatlong oras bago ang biyahe ni Estrada ay nagreklamo ito ng pananakit ng katawan.

Sa panayam naman kay Sen. Jinggoy Es­trada, sinabi nito na hindi pa maayos ang pakiramdam ng kan­yang ama subalit dahil sa lumalalang kala­gayan ni Doña Mary ay pinilit nito ang katawan para maka­punta sa ospital.

Alas-5 na ng hapon nakabalik si Estrada sa kan­yang resthouse. (Ed­win Balasa)