‘SONA payapa’ - PNP

Sinabi kahapon ni Philippine National Police Spokesman C/Supt. Sa­muel Pagdilao na pa­yapa sa pangkalahatan ang SONA bunsod ng mga hakbang na panse­gu­ ridad na ipinatupad ng pulisya.

Ang National Capital Region Police Office ay nagpakalat ng 9,000 pulis sa Quezon City ha­bang nakaalerto naman ang 2,000 tropa ng Metro Manila command ng Armed Forces of the Philippines.  

Ayon naman kay  Supt. Rhodel Sermonia, Public Information Officer ng NCRPO, sa mahigit 3,000 raliyista mula sa mga militanteng grupo ay walang napa­ulat na pang­gugulo at wala ring inaresto ang pulisya.

Bigo namang maka­la­pit sa Batasan Complex na pinagdausan ng SONA ang tinatayang 7,000 ak­tibista dahil sa epektibong pag­baban­tay ng pulisya.

Nag-umpisang mag­girian ang mga militante at libo-libong anti-riot police dakong alas-7:00  ng umaga nang tang­kain ng mga raliyista na mag­tungo sa St. Peters Parish church  sa Commonwealth Avenue na idinek­larang no rally zone ng mga awtoridad.

Nakuntento na la­mang ang mga militante na magsagawa ng ka­nilang programa sa iti­nakdang rally zone ma­layo sa Batasan Com­plex kung saan tinuligsa ng mga ito ang mga panga­kong napako umano ng admi­nistrasyong Arroyo bu­hat sa nakaraang SONA nito at patuloy na pag­taas ng bilang ng extra-judicial killings.

Isang effigy rin ang sinunog kung saan ini­lalarawan ang Pangulo na isang Manananggal dahil sa pagtanggal uma­no sa karapatan ng mga tao sa pagpapa­tupad ng Human Security Act. (Joy Cantos, Danilo Garcia, Angie dela Cruz at Grace dela Cruz)