Kasabay ng pagsadsad ng M/V Blue Water Princess sa Quezon at pagtirik ng M/V Super Shuttle 10 sa Surigao nitong Huwebes, lumubog din ang isang barkong Orchid Sun sa Oman, ayon sa isang ulat ng ABS-CBN.
Sakay ng Orchid Sun ang may 23 tripulante kung saan 13 sa mga ito ay mga Pilipino.
Siyam na Pilipino seaman pa ang pinaghahanap sa karagatan ng Oman habang iniuulat ito.
Papunta na sanang Iran mula China ang barko nang hampasin ito ng malalakas na alon.
Hindi pa tiyak kung ano ang naging sanhi ng pagkabutas ng barko na dahan-dahan ang naging paglubog.
Patuloy namang nakikipag-ugnayan ang Philippine Consulate sa pamahalaan ng Oman at Koreanong may-ari ng barko sa pagligtas sa siyam pang Pilipino.