Pinoy boxer todas sa KO!

Isang boksingerong Pilipino ang namatay kamakalawa matapos mapatumba ng kalaban nito sa isang knockout sa ikaapat na round ng boxing sa Bangkok, Thailand.

Iniulat umano ng Philboxing.com na nagkaroon ng pagdurugo sa utak ng boksingerong si Lito Sisnorio matapos mapabagsak ng kalaban nitong Thai pug na si Chatchai Sasakul sa kanilang laban sa naturang bansa noong Biyernes.

Binawian ng buhay si Sisnorio habang ginagamot sa Piyamin Hospital sa Bangpli district sa lalawigan ng Samutprakam sa may katimugan ng Bangkok.

Sinasabi sa ulat na umalis ng Pilipinas si Sisnorio nang hindi dumaan sa Games and Amusement Board, isang ahensyang kumukontrol sa boxing competition sa bansa.

Naganap sa Wat Sing School sa Thailand ang labanan nina Sisnorio at ni Chatchai na isang dating World Boxing Council Flyweight champion. Sunud-sunod na right hooks sa ulo ang tinanggap ni Sisnorio mula sa kalaban at sa gitna ng 4th round ay tuluyang tumumba ito.

Nabatid na si Chatchai ay tinalo ni WBC International Super Featherweight champion Manny Pacquiao noong Disyembre 1998.