Pagpapalaya sa 24 Pinoy sisikapin ng gobyerno

Nangako ang Malacanang na gagawin nito ang lahat para sa ligtas na pagpapalaya sa 24 na Filipino workers na binihag ng mga Nigerian militants.

Sinabi ni Press Secretary at Presidential Spokesman Ignacio Bunye, ipinabatid sa kanila na hindi 6 kundi 24 ang Pinoy na dinukot ng mga militanteng Nigerians habang lulan ang mga ito ng German Baco III Liner.

Ayon kay Sec. Bunye, nakikipag-negosasyon na ang mga awtoridad ng Nigeria sa mga armadong grupong dumukot sa mga Pinoy para mapalaya na ang mga ito.

Sinabi ni Bunye, hindi dapat mangamba ang mga pamilya ng mga bihag na Pinoy dahil ginagawa ng gobyerno ang lahat para sa ligtas na paglaya ng mga ito.

Naniniwala ang Palasyo na makukumbinsi ng Nigerian authorities ang mga kidnappers para palayain ang mga Pinoy na bihag ng mga ito.

Inihayag din ni Bunye na patuloy pa rin ang pag-iral ng ban sa pagpapadala ng mga OFW’s sa Nigeria habang hindi pa natitiyak ang kaligtasan ng ating mga manggagawa sa naturang bansa. (LTolentino)