Sa apat na pahinang resolusyon na sinulat ni Associate Justice Apolinario Bruselas Jr., nilinaw nito na kailangan munang determinahin kung nagkaroon ng pag-abuso sa kapangyarihan si Makati Judge Benjamin Pozon nang ipasya ng hukom na manatili sa Makati City Jail ang nasabing sundalo.
Ayon pa sa resolusyon, kung pagbibigyan ang petition ni Smith ay para na rin nilang ibinasura ang hatol o idineklara na nagkamali si Judge Pozon sa kanyang desisyon.
"A temporary restraining order may not be granted at this time because the meat of the herein petition precisely involves a determination of the regularity of the act of respondent judge in directing the confinement in the MCJ," saad sa resolusyon.
Banggit pa ng mga mahistrado, sakaling hindi sila maglalabas ng TRO ay hindi naman ito magdudulot ng perhuwisyo kay Smith.
Kasabay nito ay binigyang pagkakataon ng CA si Judge Pozon upang idepensa ang naging desisyon. Binigyan ng 10-araw ng Appeals court ang hukom upang isumite ang kanyang komento. (Grace dela Cruz)