Sa ulat na nakarating sa Camp Crame, isinuko ni North Cotabato Governor Emmanuel Piñol ang suspek na si Banisilan Mayor Floro Allado kay P/Supt. Marcelo Pintac, hepe ng Criminal Investigation and Detection Group (CIDG) sa North Cotabato.
Pormal namang sinampahan ng kasong multiple murder, multiple frustrated murder at multiple attempted murder ang nasabing alkalde kaugnay sa pamamaslang sa limang sibilyang lulan ng trak patungong bayan ng Banisilan para maghatid ng bigas. Bukod kay Mayor Allado, sinibak din ang buong hanay ng kapulisan kabilang na si PO2 Dindo Seralde sa bayang nabanggit at isinailalim sa kustodiya ng Kidapawan City police station.
Base naunang ulat ni Police Insp. Abraham Dandan, hepe ng pulisya sa bayan ng Banisilan, pinagbabaril ng grupo ni Mayor Allado ang hauler truck ng mga biktima at si Arneli Apas lamang ang nakaligtas. (Angie dela Cruz)