Sinabi ni Atty. Freddie Villamor, abugado ni Rep. Daza, ang complainant na si Archie Vineles ay dating empleyado ng mambabatas sa kanilang family business subalit tinanggal dahil nalamang mandaraya ito at sinusuba ang kapwa niyang empleyado.
Ibinunyag pa ni Atty. Villamor, tinangka pa ni Vineles na kumbinsihin ang kanyang mga kapwa empleyado na mag-imbento sila ng kuwentong anomalya laban sa kongresista na pinatunayan nina Danilo Martinez at Michael Bilaya sa kanilang mga sworn affidavit.
Sinabi pa ng dalawa sa kanilang affidavit, gustong sirain ni Vineles ang mambabatas dahil hindi siya nabigyan ng regalo noong birthday ni Bobby Castelo.
Ayon naman kay Richard Cabrera, pinagbantaan siya ni Vineles matapos niyang tanggihang sumama sa plano nitong pag-imbento ng anomalya laban kay Daza.
Winika pa ni Atty. Villamor, totoong maraming constituents si Daza na natulungan at nabigyan ng trabaho pero kailanman ay hindi ito nanghihingi ng kapalit gaya ng nais palitawin ni Vineles sa kanyang paninira sa mambabatas.
"Talagang tinanggal ni Rep. Daza si Vineles ng malaman nitong sumasahod siya sa MMDA na lingid sa kaalaman ng kongresista habang kumukubra din ng suweldo sa Buns and Pizza," dagdag pa ni Villamor.