Sa pagpapatuloy ng ikatlong preliminary investigation sa Subic rape case ay hindi sumipot ang 6 na akusadong sundalo pati ang driver ng Starex van na si Timotheo Soriano na ibinilang na ring respondent ng kaso.
Sinabi ni Olongapo City Chief Prosecutor Prudencio Jalandoni, hindi nilang tinanggap ang isinumiteng affidavit ni Soriano dahil hindi ito napanumpaan sa prosecutor.
Inatasan nito ang magkabilang-panig na magsumite ng memorandum sa loob ng 10 araw.
Sa isinumiteng dokumento ng 2 ahente ng US Naval Criminal and Investigation Service sa Olongapo Prosecutors Office ay inamin ng akusadong si Cpl. Daniel Smith na nakipagtalik siya sa 22-anyos na Pinay sa loob ng starex van subalit hindi niya ito ginahasa kundi kusa itong pumayag makipag-sex.
Sinabi pa ni Smith sa NCIS na kaya lamang nagalit ang noo’y lasing na lasing na Pinay ay dahil tinawag siyang "bitch" ng isa sa kanyang kasamahan sa loob ng van.
Iginiit naman ng mga abugado ng biktima na magpapabagal sa kaso ang hindi paglutang ni Soriano sa imbestigasyon at sinisi nito ang prosecution matapos ituring na respondent ang driver ng van kaya natakot humarap sa pagdinig. (Grace dela Cruz/Jeff Tombado)