Serbisyo ni Recom umarangkada

Karagdagang serbisyo at trabaho sa mga mamamayan ang ipinagkaloob ni Caloocan City Mayor Enrico "Recom" Echiverri sa unang taon ng kanyang pamamahala, batay sa ulat na isinumite ng Department of Urban, Social, Industrial Relations Services (DUSIRS).

Tinatayang 3,093 pamilya na nasunugan, nawalan ng bahay at nasalanta ng iba’t ibang kalamidad sa lungsod ang napagkalooban ng relief assistance.

Samantala, 247 kabataan ang nabiyayaan sa Petron Tulong-Aral habang 183 batang lansangan ang nailigtas sa kalsada sa pamamagitan ng isinagawang Sagip Kalinga rescue operations ng mga empleyado ng DUSIRS. Gayundin, 219 solo parent ang natulungan.

Halos P1,661,000.50 ang inilaang pondo ng lokal na pamahalaan para sa mga proyektong pangkabuhayan sa mga residente.

Nakasaad rin sa ulat na 400 menor-de-edad na nagkaproblema sa batas ang natulungan. Tinatayang 15, 343 mga bata na rin ang nakikinabang sa mga day care center sa lungsod.

Mula naman Hulyo 2004—Hulyo 2005 ay 7,372 residente ng lungsod ang nagkaroon ng trabaho at 24,365 ang nailaang trabaho sa mga mamamayan sa apat na job fair.