Ayon kay Ilocos Norte Rep. Imee Marcos, isang kilos-protesta ang isasagawa ng oposisyon sa Kamara sa pamamagitan ng walkout sa araw ng SONA ni PGMA sa darating na July 25.
Bukod sa walkout, wika pa ni Rep. Marcos, plano din nilang magsuot ng black ribbon sa kanilang braso at ang hindi pagtayo sa pagdating ni PGMA sa plenaryo para sa kanyang SONA.
"Nananawagan kami na mag-resign si GMA, tapos tatayo kami sa loob ng session hall sa harap ng kanyang SONA? Malabo yata yon," wika pa ni Marcos.
Maliban sa oposisyon, nakatakdang makiisa din sa boykot ang ilang miyembro ng Nacionalista Party, Liberal Party, Lakas at independent congressmen.
Sa panig naman ni Senate President Franklin Drilon, gagampanan pa rin niya ang kanyang trabaho bilang Pangulo ng Senado sa darating na SONA sa kabila ng pangyayari na manawagan ang LP sa ilalim ng kanyang liderato na magbitiw si PGMA.
Samantala, todo naman ang ginagawang paghahanda ng Central Police District (CPD) para matiyak ang seguridad ng lahat ng dadalo sa darating na SONA sa Lunes.
Siniguro naman ni CPD director Nicasio Radovan Jr. na sapat na ang kanilang preparasyon para sa SONA ni Pangulong Arroyo. (Ulat nina Malou Rongalerios,Doris Franche at Rudy Andal)