Cam tugis ng mga pinagkakautangan

Hinamon ng mga taong nabalasubas umano ni jueteng bagwoman Sandra Cam na magbayad na sa kanyang pagkakautang matapos na lumabas na nagsisinungaling ito sa isinagawang pagdinig ng Senado kaugnay sa usapin ng jueteng.

Ayon kina Susan Sandejas Gomez at Charito Palad, dapat nang magbayad si Cam sa kanyang pagkakautang sa kanila bago ito magsalita sa Senado kaugnay sa ginagawang pagdawit sa Unang Pamilya sa operasyon ng illegal na sugal sa bansa.

Sinabi pa ni Gomez na kabilang sa ginawang kasinungalingan ni Cam sa harap ng mga senador ay ang pagsasabing bulok ang kanyang pinauupahang apartment sa Estrada st., Malate, Manila at ang pagsasabing hindi niya kilala ng personal si Palad, isa sa mga naniningil ng utang kay Cam.

"Kung bulok ang aking apartment bakit kinuha pa niya yung kabilang pinto upang palawakin ang kanyang caregiver school, common sense dictates that as a lesse, you will never rent a unit that is not liveable," pahayag ni Gomez. Umaabot sa P260,000 ang utang umano ni Cam kay Gomez.