Ex-CIDG chief sabit sa jueteng – DOJ

Nakatakdang ipatawag ng Department of Justice (DOJ) si dating PNP-Criminal Investigation and Detection Group chief, Gen. Nestorio Gualberto matapos makatanggap ng impormasyon na sangkot ito sa operasyon ng jueteng sa ilang mga lalawigan.

Ipinaliwanag ni DOJ Sec. Raul Gonzalez na isinama na niya ang pangalan ni Gualberto sa talaan ng mga personalidad na sangkot sa jueteng issue at anumang araw ay ipapatawag ito ng Anti-Jueteng Task Force para mabigyan ng pagkakataon na maihain ang kanyang depensa at pabulaanan ang mga akusasyon laban sa kanya.

Nabatid ng DOJ na si Gualberto umano ang tumatayong bangkero o financier sa operasyon ng jueteng sa Palawan at Nueva Vizcaya.

Si Gualberto ang dating opisyal ng PNP-CIDG na itinuro ng akusadong si Philip Medel Jr. na nagpahirap sa kanya para aminin umano ang pagpatay sa aktres na si Nida Blanca at idawit si Rod Strunk sa krimen. (Ulat ni Grace dela Cruz)