Libreng legal assistance sa mga guro sa Mayo 10

Magbibigay ng libreng legal assistance ang Department of Education katulong ng ilang grupo ng mga abogado at Comelec sa mga gurong magsisilbi bilang miyembro ng Board of Election Inspectors (BEIs) para sa halalan sa Mayo 10.

Nilagdaan kahapon ang isang Memorandum of Agreement (MOA) na may temang "Tanggol Guro sa Halalan 2004-A Teachers Defence Network" na ang pangunahing layunin ay magbigay ng libreng legal assistance sa mahigit na 150,000 mga pampublikong guro na inaasahang maglilingkod sa bayan sa Mayo 10.

Sa rekord ng mga nagdaang halalan, maraming mga guro ang umano’y nakaranas ng panghaharass, pananakot at pananakit buhat sa ilang mga grupong nais na guluhin at sirain ang malinis at mapayapang halalan.

Kinabibilangan ito ng Integrated Bar of the Philippines (IBP), Public Attorney’s Office (PAO), Philippine Asso. of Laws (PALs), Lawyers League for Liberty (Libertas) at Legal Officers Asso. of the Department of Education (LOADED). (Ulat ni Edwin Balasa)