Dugo muntik dumanak sa sortie ng KNP

ILIGAN CITY - Muntik ng dumanak ng dugo sa pagitan ng dalawang grupo ng supporters ni KNP bet Fernando Poe, Jr. na nag-aagawan sa pagiging host ng rali ng Koalisyon ng Nagkakaisang Pilipino (KNP) kahapon sa Marawi City.

Napilitang kanselahin ng KNP ang kanilang nakatakdang rali sa gymnasium ng Marawi City kahapon dahil sa pag-aaway ng grupo nina Akmad Tumawis na chairman ng KNP sa Lanao del Norte at KNP congressional candidate Ali Gutok Tumamina na nag-aagawan ng kredito sa pagiging punong-abala ng okasyon.

Nagkabit umano ng mga streamers at banners ng mga kandidato ng KNP ang grupo ni Tumamina kamakalawa ng gabi sa paligid ng gym subalit ng dumating ang mga armadong grupo ni Tumawis ay inalis ng mga ito saka isinara ang gym at siya daw ang binigyan ng KNP headquarters ng awtorisasyon para maging host ng event at hindi ang grupo ni Tumamina.

Iginiit umano ng grupo ni Tumawis na sila ang dapat mamuno sa akomodasyon ng grupo ni FPJ sa Marawi dahil si Tumawis ang chairman ng KNP sa Lanao del Sur pero nagpumilit ang grupo ni Tumamina na huwag alisin ang kanilang mga ikinabit na banner dahil sila ang kinikilalang host ng okasyon.

Napigil lamang ang madugong komprontasyon ng kapwa armadong grupo nina Tumamina at Tumawis ng dumating ang may isang batalyong miyembro ng Phil. Marines.

Hanggang kahapon ng umaga ay mainit pa rin ang sitwasyon kahit naawat ng militar ang napipintong salpukan ng dalawang grupo ng supporters ni FPJ sa Marawi City.

Napilitan ang KNP na baguhin ang ruta ng kampanya sa araw na ito. Dapat sa Cotabato City magtatapos ang sortie ngayong gabi pero dahil din sa seguridad ay napilitang ngayong umaga na lamang magsisimula sa naturang lungsod patungo sa Midsayap hanggang Kidapawan town sa North Cotabato. (Ulat ni Rudy Andal)