Bagong BI cheif hinamong walisin ang undocumented aliens sa bansa

Hinamon kahapon ni Senador Edgardo Angara ang bagong talagang commissioner ng Bureau of Immigration (BI) na si Alipio Fernandez na walisin ang undocumented aliens sa bansa.

Sinabi ni Sen. Angara na ang isa pang poproblemahin ni Fernandez ay ang pang-aabuso ng mga dayuhan sa hospitality ng ating bansa kaya malakas ang loob nilang mag-overstay.

"Just go to Divisoria and you will immediately realize the magnitude of the problem. The place is teeming with overstaying aliens, as can be seen from the facial and physical features of those who conduct business there," sabi ni Angara.

Dahil sa mga problemang ito, tuwiran na ring inakusahan ni Angara na naging inutil ang nagbitiw na komisyuner ng BI na si Andrea Domingo sa paghuli ng undocumented at overstaying aliens.

Kaugnay nito, ipinasisilip naman ni Angara sa BI kung inaabuso ng ibang ahensiya ng gobyerno ang pag-iisyu ng visa sa mga dayuhan,

Bukod sa Department of Foreign Affairs (DFA), nag-iisyu din ng investor visa ang Department of Trade and Industry samantalang retirement visa naman ang ibinibigay ng Philippine Leisure and Retirement Authority.

Matatandaan na ilan sa mga Chinese nationals na nahuli sa raid ng mga shabu laboratories sa bansa ay nakapasok sa Pilipinas taglay ang investor visa. (Ulat ni Rudy Andal)