Labi ng 4 Pinoy seamen sa sumabog na tanker dumating

Dumating na sa Pilipinas ang mga labi ng apat na Filipino seaman na namatay nang sumabog ang oil tanker na Exfinos sa karagatan ng Fujairah, United Arab Emirates noong Hunyo 18.

Lulan ng Emirates flight EK 33 buhat sa Riyadh ang mga bangkay nina Domingo John Fernandez ng Novaliches, QC; Joney Marcelino ng Mamburao, Capiz; Almie Omac ng Davao City at Joe Morial ng southern Leyte na lumapag sa Ninoy Aquino International Airport (NAIA)dakong alas-10 noong Linggo ng gabi. Ang mga bangkay nina Marcelino, Omac at Moiral ay sinakay sa isang domestic flight patungo sa kanilang mga lalawigan, samantala ang labi naman ni Fernandez ay dinala ng kanyang mga kamag-anak sa Novaliches bago dalhin sa Cebu City.

Makakatanggap ng tig-P200,000 ang naulila ng mga biktima, bukod pa sa ibang benepisyong kanilang tatanggapin buhat sa OWWA at sa foreign employer nito. (Ulat nina Butch Quejada/Ellen Fernando)