Perjury kay Ador

Sasampahan ng kasong perjury ng Department of Justice (DOJ) si dating Intelligence Service of the Armed Forces of the Philippines (ISAFP) witness Angelo "Ador" Mawanay dahilan sa pagbaligtad nito sa kanyang sinumpaang pahayag laban kay Senador Panfilo Lacson.

Sinabi ni Justice Undersecretary at Witness Protection Program (WPP) chairman Jose Calida na ang ginawang pagbawi ni Mawanay ng kanyang mga statement under oath ay isang malinaw na pagsisinungaling.

Dahilan dito kaya tinawag ni Calida si Mawanay na isang "polluted witness" dahil sa pagtanggal dito sa WPP bunsod na rin ng credibility problem nito kaya imposible na umano itong maibalik sa WPP matapos nitong lokohin ang gobyerno at paniwalain sa kanyang hindi makatotohanang mga pahayag. (Ulat ni Gemma Amargo)