Barko lumubog: 7 Pinoy nawawala

Wala pang isang linggo, isa na namang barko na may Filipino flag ang lumubog sa karagatan ng Japan at isang tripulanteng Pinoy pa lamang ang iniulat na nasagip habang 7 pa ang pinaghahanap.

Sa ulat ng embahada ng Pilipinas sa Tokyo, Japan kasalukuyang nasa ospital doon ang nasagip na si Nilo Macasling, chief engineer ng lumubog na M/V Mahlia, may bigat na 217.14 tonelada. Lulan nito ang 8 crew.

Ayon sa Department of Foreign Affairs, nakita si Macasling ng mga nagrespondeng kagawad ng M/V Asian Dynasty, isa ring Philippine cargo vessel habang nasa isang safety bag.

Ang 7 seamen na nawawala ay pawang nakasuot ng life jacket bago bumaligtad hanggang sa tuluyang lumubog ang barko.

Isang search and rescue operations na ang isinasagawa para sa 7 missing Pinoy seamen. (Ulat ni Ellen Fernando)