Kasong kriminal sa nakabaril na Kano

Posibleng sampahan ng kasong kriminal ang Amerikanong sundalo na umano’y nakabaril sa isang hinihinalang miyembro ng Abu Sayyaf Group (ASG) sa Tuburan, Basilan.

Sinabi ni Department of Justice (DOJ) Secretary Hernando Perez na hindi pa rin ligtas ang sundalong si Reggie Lane na umano’y bumaril sa Yakan member na si Buyong-Buyong Isnijal dahil wala anyang immunity from suit ang mga sundalong Amerikano kahit na kabahagi sila ng Balikatan Exercises kung meron umanong kasalanan ang mga ito.

Nilinaw pa ng kalihim na walang nakasaad sa Visiting Forces Agreement (VFA) na hindi puwedeng sampahan ng kasong kriminal ang sinumang sundalong Kano na lalabag sa anumang batas ng Pilipinas.

Hindi naman umano diplomats ang mga US troops na kabahagi ng Balikatan kaya hindi maaaring ipawalang-sala ang mga ito sa anumang kasong kriminal at sibil.

Magugunitang binatikos kamakailan ang pamahalaang Arroyo ng militanteng grupong Bayan Muna dahil sa anila’y pagkunsinti ng Pangulo sa mga Amerikanong sundalo kahit na tahasang nalalabag ng mga ito ang batas sa bansa. (Ulat ni Gemma Amargo)