Ople, Sotto di inalok ng posisyon sa Gabinete

Pinabulaanan ng Malacañang na inalok ni Pangulong Arroyo sina Senators Blas Ople at Vicente Sotto ng puwesto sa Gabinete para masigurong mananatili ang kontrol ng administrasyon sa Mataas na Kapulungan ng Kongreso.

Napaulat na si Ople ay ilalagay umano sa posisyong Foreign Affairs secretary, samantala si Sotto ay DILG secretary.

Sa isang press briefing kahapon, sinabi ni acting Press Secretary Silvestre Afable na walang katotohanan ang ulat dahil hindi naging ugali ng Pangulo ang gumawa ng ganitong pambubuyo.

Pinasinungalingan din ni Afable na nahuli umano si Senador Ramon Revilla na nakikipag-usap kay First Gentleman Mike Arroyo na gustong makatiyak na makakasama ang kanyang anak na si ex-Cavite Gov. Bong Revilla sa mga kandidatong senador ng administrasyon. (Ulat ni Lilia Tolentino)