Jinggoy hindi pinayagan ng Sandiganbayan

Hindi pinagbigyan ng Sandiganbayan Special Division ang kahilingan ni Jinggoy Estrada na ma-confine sa San Juan Medical Center makaraang mabigo ang depensa na patunayang kulang ang kagamitan sa Veterans Memorial Medical Center (VMMC) upang magamot ang dating alkalde sa sakit nitong Hematochezia o pagdurugo ng puwet.

Sa ibinabang desisyon nina acting Presiding Justice Minita Chico-Nazario, chairperson ng Special Division, Associate Justices Edilberto Sandoval at Teresita Leonardo-de Castro, maaaring gamutin ang dating San Juan mayor dahil kumpleto naman umano ang kagamitan sa VMMC.

Magugunitang ilang beses na ring pinagbigyan ng Special Division si Jinggoy na madala sa Makati Medical Center dahil sa hindi normal na tibok ng puso.

Una nang pinaghinalaan na nagpapalusot lamang umano si Jinggoy para makapuslit dahil malapit na sa kanilang bahay ang ospital na gusto niyang pagpagamutan at may pagkakataon siyang makauwi kahit saglit lang sa kanila. (Ulat ni Malou Rongalerios)