Wycoco, sisibakin sa NBI ?

Sacrificial lamb umano si National Bureau of investigation (NBI) Director Reynaldo Wycoco bilang ‘palit-ulo’ sa pagkakakumpirma kay DOJ Secretary Hernando Perez sa Commission on Appointment (CA), kamakailan .

Ito ang nabatid sa isang reliable source kasunod ng umano’y paggapang ng isang religious group kapalit ng pagsuporta nila sa kumpirmasyon ni Perez sa CA dahil sa tatlong beses na pagkaka-antala nito.

Ayon sa source, malaki ang galit nila kay Wycoco dahil kinakalaban umano nito ang isang Senador na sinuportahan ng grupo noong nakaraang eleksyon.

Bukod dito, isa pa sa sinisilip na dahilan ay ang kahinaan umano ng liderato ni Wycoco na lutasin ang mga sensational cases gaya ng Nida Blanca murder case at iba pang nakabinbing kaso.

Sinasabing magiging epektibo daw ang pagpapatalsik kay Wycoco sa susunod na buwan. (Ulat ni Ellen Fernando)